Poslovne vijesti - Makedonija

Остварен буџетски суфицит во април

Буџетот на Република Македонија во април оствари суфицит од 172 милиони денари, покажуваат во петокот објавените показатели на Министерството за финансии, според коишто вкупните приходи изнесуваат 16.657 милиони денари, а расходите 14.485 милини денари.

Вкупните даночни приходи изнесуваат 7.092 милиони денари, од кои најголем прилив има од данокот на додадена вредност (ДДВ) од 3.419 милиони денари, потоа е персоналниот данок на доход со 959 милиони денари, данокот на добивка со 755 милиони денари, од акцизи 1.195 милиони денари, додека неоданочените приходи изнесуваат 773 милиони денари.

Вицепремиерот и министер за финансии Зоран Ставрески неодамна во интервјуто за агенцијата МИА изјави дека Буџетот е во добра кондиција. Како што посочи, приливот на средства во првите четири месеци од 2013 година е во рамките на очекуваното, а плаќањата се вршат навремено.

Според Ставрески, остварениот суфицит ќе помогне да се изврши нивелација на зголемените расходи во февруари и на почетокот на годината и во март поврзани со плаќањата на обврските кон стопанството и субвенциите. Дефицитот е во рамки на очекувањата и таков ќе биде до крајот на годината, а вицепремиерот очекува да се исполнат зададените проекции.